୫ ରାଜ୍ୟର ନିର୍ବାଚନ ଫଳାଫଳ! ସମସ୍ତଙ୍କ ଉପରେ ଭାରି ପଡିଲା ମୋଦିଙ୍କ ମ୍ୟାଜିକ୍

୪ଟିରେ ବିଜୟ ସହ ସରକାର ଗଠନ ଆଡକୁ ଗତି କରୁଛି ବିଜେପି

ନୂଆଦିଲ୍ଲୀ : ୨୦୧୯ ସାଧାରଣ ନିର୍ବାଚନରେ ​​ବିଜେପି ଏକ ବଡ଼ ବିଜୟ ହାସଲ କରିଥିଲା, କିନ୍ତୁ ଠିକ ଏକ ବର୍ଷ ପରେ ଦେଶରେ କରୋନା ମହାମାରୀ ଦେଖାଦେଇଥିଲା ଏବଂ କୃଷକ ଆନ୍ଦୋଳନ ମଧ୍ୟ ଆରମ୍ଭ ହୋଇଥିଲା । ଏହା ବ୍ୟତୀତ ଦେଶରେ ମୁଦ୍ରାସ୍ଫୀତି ଏବଂ ବେକାରୀକୁ ମଧ୍ୟ ବିରୋଧୀ ଦଳ ଏକ ବଡ଼ ପ୍ରସଙ୍ଗ କରିଥିଲେ । ଗୋଟିଏ ପଟେ ପଶ୍ଚିମ ୟୁପିରେ କୃଷକଙ୍କ ଆନ୍ଦୋଳନ ଏକ ବଡ଼ ପ୍ରସଙ୍ଗ ଭାବରେ ଉଭାହେବା ବେଳେ, ଅନ୍ୟପଟେ ଉତ୍ତରାଖଣ୍ଡର ତିନିଜଣ ମୁଖ୍ୟମନ୍ତ୍ରୀ ବଦଳାଇବାର ଚର୍ଚ୍ଚାରେ ହେଉଥିଲା । କିନ୍ତୁ ଏହି ସବୁ ସମସ୍ୟାକୁ ନେଇ ବିରୋଧୀ ଲାଭ ଉଠାଇବାକୁ ଚାହିଁଥିଲେ ମଧ୍ୟ ଶେଷରେ ଆଜି ଆସିଥିବା ନିର୍ବାଚନ ଫଳାଫଳ ବିଜେପି ସପକ୍ଷରେ ଆସିଛି । ୫ ରାଜ୍ୟ ମଧ୍ୟରୁ ୪ଟିରେ ବିଜେପି ବିଜୟ ସହ ସରକାର ଗଠନ କରିବାକୁ ଆଡକୁ ଗତି କରୁଛି । ବିଶେଷକରି ଉତ୍ତରପ୍ରଦେଶର ବିଜୟ ହେଉଛି ବିଜେପି ପାଇଁ ଗୁରୁତ୍ୱପୂର୍ଣ୍ଣ, ଯେଉଁଠାରେ ଗୋଟିଏ ଦଳ ୩୫ ବର୍ଷ ପରେ ପୁନର୍ବାର କ୍ଷମତାକୁ ଫେରୁଛି ।

ଏହା ବ୍ୟତୀତ ଉତ୍ତରାଖଣ୍ଡରେ ମୁଖ୍ୟମନ୍ତ୍ରୀଙ୍କ ପରିବର୍ତ୍ତନ ହୋଇଥିଲା କିନ୍ତୁ ତାହା ବିଜେପି ବିରୁଦ୍ଧରେ ଯାଇ ନାହିଁ । ୨୦୦୦ ରେ ଉତ୍ତରାଖଣ୍ଡ ଗଠନ ହେବା ପରେ ଏହା ପ୍ରଥମ ଥର ପାଇଁ ଓ ଲଗାତାର ଦ୍ୱିତୀୟ ଥର ପାଇଁ କୌଣସି ଏକ ଦଳ କ୍ଷମତା ହାସଲ କରିଛି । ମଣିପୁରରେ ବିଜେପି ଏକକ ବୃହତ୍ତମ ଦଳ ଭାବେ ଉଭା ହୋଇଛି ଏବଂ ୬୦ ଟି ଆସନ ମଧ୍ୟରୁ ୨୫ ଟି ଜିତିବାର ଦେଖାଯାଉଛି । ଏଥିରୁ ସ୍ପଷ୍ଟ ଯେ ସେ ସରକାର ଗଠନ କରିବାର ସ୍ଥିତିରେ ଅଛନ୍ତି । ୪୦ ଟି ସିଟ୍ ବିଶିଷ୍ଟ ଗୋଆରେ ବିଜେପି ୧୯ ଟି ଆସନରେ ଆଗୁଆ ରହିଛି । ଏହାର ଅର୍ଥ ହେଉଛି ଏଥର ବିଜେପି ନିର୍ବାଚନରେ ​​୪-୧ ରେ ଜିତୁଛି । ଏହି ବଡ଼ ବିଜୟ ପଛରେ ମୋଦି ମ୍ୟାଜିକ୍ ମଧ୍ୟ ବିଶ୍ୱାସ କରାଯାଏ । ବିରୋଧୀ ଦଳର ନେତା ତଥା କିଛି ରାଜନୈତିକ ବିଶେଷଜ୍ଞ ବିଶ୍ୱାସ କରୁଥିଲେ ଯେ ମୋଦିଙ୍କ ଯାଦୁ ଦୁର୍ବଳ ହେଉଛି, କିନ୍ତୁ ଫଳାଫଳ ଏହିପରି ସମସ୍ତ ଦାବିକୁ ଭୁଲ ପ୍ରମାଣିତ କରିଛି । ଜାଣନ୍ତୁ ମୋଦିଙ୍କ ମ୍ୟାଜିକ୍ କେମିତି ପଡିଛି ଭାରି…

ଉତ୍ତରପ୍ରଦେଶ ସମେତ ସମସ୍ତ ରାଜ୍ୟରେ ବିଜେପି ତରଫରୁ ମାଗଣା ରାସନ ଏବଂ ଘର ଦେବା ନେଇ ଆଲୋଚନା ହୋଇଥିଲା । ପିଏମ ଆବାସ ୟୋଜନା, ରାସନ ସ୍କିମ ଏବଂ ଉଜ୍ବଳା ପରି ସମସ୍ତ ଯୋଜନାକୁ ବିଜେପି ବହୁଳ ଭାବରେ ପ୍ରଚାର କରିଥିଲା । ସିଏମ୍ ଯୋଗୀ ଆଦିତ୍ୟନାଥ ପ୍ରାୟ ପ୍ରତ୍ୟେକ ସଭାରେ କହିଥଲେ ଯେ ରାଜ୍ୟରେ ୧୫ କୋଟି ଲୋକଙ୍କୁ ମାଗଣା ରାସନ ଦିଆଯାଉଛି । କିନ୍ତୁ ଏହି ଯୋଜନା କେବଳ କେନ୍ଦ୍ର ସରକାରଙ୍କର ଅଟେ । ଏଭଳି ପରିସ୍ଥିତିରେ କେନ୍ଦ୍ର ସରକାରଙ୍କ କଲ୍ୟାଣକାରୀ ଯୋଜନା କାର୍ଯ୍ୟ କରିଛି ଏବଂ ଏହାର ପ୍ରଭାବ ଦୃଶ୍ୟମାନ ହେଉଛି ବୋଲି ବିଶ୍ୱାସ କରାଯାଏ ।

ଉତ୍ତରାଖଣ୍ଡରେ ୨୦୧୭ରେ ବିଜୟ ପରେ ବିଜେପି ଆରଏସଏସର ପ୍ରଚାରକ ତ୍ରିବେନ୍ଦ୍ର ସିଂ ରାୱତଙ୍କୁ ସିଏମ କରିଥିଲା । କିନ୍ତୁ ଯେତେବେଳେ ଯେତେବେଳେ ପରିସ୍ଥିତି କିଛି ବଦଳିଥିଲା, ସେତବେଳେ ତିରଥ ସିଂ ରାୱତଙ୍କୁ ତ୍ରିବେନ୍ଦ୍ର ସିଂଙ୍କ ସ୍ଥାନରେ ସିଏମ୍ କରାଯାଇଥିଲା ଏବଂ ଗତ କିଛି ମାସ ପୂର୍ବେ ତାଙ୍କୁ ମଧ୍ୟ ହଟାଇ ଦିଆଯାଇଥିଲା ଏବଂ ପୁଷ୍କର ସିଂ ଧାମିଙ୍କୁ ନେତୃତ୍ୱ ଦିଆଯାଇଥିଲା । ଏପରି ଅସ୍ଥିରତା ବିଜେପିକୁ କ୍ଷତି ପହଞ୍ଚାଇପାରେ ବୋଲି ବିଶ୍ୱାସ କରାଯାଉଥିଲା, କିନ୍ତୁ ଯଦି ଫଳାଫଳକୁ ଦେଖାଯାଏ ତେବେ ଏହା ବିଜେପି ସପକ୍ଷରେ ଯାଇଛି । ଏହା ହେଉଛି ମୋଦିଙ୍କ ମ୍ୟାଜିକ୍, ଯାହା ପାଇଁ ସମସ୍ତ ଅସ୍ଥିରତା ସତ୍ତ୍ୱେ ଦଳ ଏକ ବଡ଼ ବିଜୟ ହାସଲ କରିଛି । ଏହି ବିଜୟ ଏତେ ବଡ ରହିଛି ଯେ କଂଗ୍ରେସ ପୂର୍ବ ସିଏମ ହରିଶ ରାୱତ ନିଜେ ଲାଲକୁଆଁ ଆସନରୁ ହାରି ଯାଇଛନ୍ତି ।