ଜାଣନ୍ତୁ କେବେ ଏବଂ କିପରି ହୋଇଥିଲା ପ୍ରଭୁ ଶ୍ରୀ ରାମଙ୍କ ଜନ୍ମ, ପଢ଼ନ୍ତୁ ସମ୍ପୂର୍ଣ୍ଣ କାହାଣୀ

ରାମନବମୀ ଚୈତ୍ର ନବରାତ୍ରୀର ଶେଷ ଦିନରେ ପାଳନ କରାଯାଏ । ଭଗବାନ ଶ୍ରୀ ରାମ ରାମନବମୀ ଦିନ ଜନ୍ମ ହୋଇଥିଲେ । ଏଠାରେ ପଢ଼ନ୍ତୁ ଶ୍ରୀ ରାମ ଜନ୍ମକଥା ଅର୍ଥାତ୍ ପ୍ରଭୁ ରାମଙ୍କ ଜନ୍ମର ସମ୍ପୂର୍ଣ୍ଣ କାହାଣୀ … 

ହିନ୍ଦୁ ବିଶ୍ୱାସ ଅନୁଯାୟୀ, ଚୈତ୍ର ମାସ ଶୁକ୍ଳ ପକ୍ଷ ନବମ ଦିନରେ ଭଗବାନ ଶ୍ରୀ ରାମ ପୃଥିବୀରେ ଜନ୍ମ ନେଇଥିଲେ । ପ୍ରତିବର୍ଷ ଏହି ଦିନରେ ରାମନବମୀ ପର୍ବ ପାଳନ କରାଯାଏ । ମହର୍ଷି ବାଲ୍ମୀକଙ୍କ ବାଳ କାଣ୍ଡ ଏବଂ ତୁଳସୀ ଦାସଙ୍କ ରାମଚରିତ ମାନସରେ ମଧ୍ୟ ଏହି ତାରିଖରେ ଶ୍ରୀ ରାମଙ୍କ ଜନ୍ମ ହୋଇଥିବା ଉଲ୍ଲେଖ କରାଯାଇଛି । ତେବେ ତାଙ୍କ ଜନ୍ମକୁ ନେଇ ଭିନ୍ନ ଭିନ୍ନ ମତ ରହିଛି । ଅଧିକାଂଶ ବିଦ୍ୱାନ ପ୍ରଭୁ ଶ୍ରୀ ରାମଙ୍କ ଜନ୍ମ ସମୟକୁ ଅଭିଜିତ ମୁହୂର୍ତ୍ତରେ ବୋଲି କୁହନ୍ତି । ଏହି ପୃଥିବୀରେ ଭଗବାନ ଶ୍ରୀ ରାମ ପ୍ରାୟ ୫୧୦୦ ବର୍ଷ ପୂର୍ବେ ଅବତାର ନେଇଥିଲେ ।

କିପରି ହୋଇଥିଲା ଶ୍ରୀ ରାମଙ୍କ ଜନ୍ମ?
ପୌରାଣିକ ବିଶ୍ୱାସ ଅନୁଯାୟୀ ଭଗବାନ ଶ୍ରୀ ରାମ ଜଣେ ଅବତାରି ପୁରୁଷ ଥିଲେ । ତାଙ୍କୁ ବିଷ୍ଣୁଙ୍କର ସପ୍ତମ ଅବତାର ବୋଲି ବିବେଚନା କରାଯାଏ । ଭଗବାନ ଶ୍ରୀ ରାମଙ୍କୁ ପୃଥିବୀକୁ ମର୍ଯ୍ୟାଦା ବାର୍ତ୍ତା ଦେବା ପାଇଁ ପଠାଯାଇଥିଲା । ସେଥିପାଇଁ ସେ ମର୍ଯ୍ୟାଦା ପୁରୁଷୋତ୍ତମମ୍ ନାମରେ ମଧ୍ୟ ଜଣାଶୁଣା ।

ଯଦିଓ ଶ୍ରୀ ରାମ ଜଣେ ଅବତାରି ପୁରୁଷ ଥିଲେ କିନ୍ତୁ ସେ ସାଂସାରିକ ପ୍ରକ୍ରିୟାର ଏକ ଅଂଶ ଭାବରେ ନିଜ ମାତୃ ଗର୍ଭରୁ ଜନ୍ମ ହୋଇଥିଲେ । ଭଗବାନ ଶ୍ରୀ ରାମ ଅଯୋଧ୍ୟା ରାଜା ଦଶରଥ ଏବଂ ତାଙ୍କ ପତ୍ନୀ କୌଶଲ୍ୟାଙ୍କ ପୁତ୍ର ଥିଲେ । ବାସ୍ତବରେ, ରାଜା ଦଶରଥଙ୍କର ପୁତ୍ର ସନ୍ତାନ ହେଉ ନଥିଲା । ସେ ପୁତ୍ର ସନ୍ତାନ ପାଇବା ପାଇଁ ଏକ ଯଜ୍ଞ କରିବାକୁ ସ୍ଥିର କଲେ ।

ଏହାପରେ ରାଜା ଦଶରଥ ଅନେକ ମହାନ ଋଷି, ତପସ୍ୱୀ ଏବଂ ବିଦ୍ୱାନଙ୍କୁ ଯଜ୍ଞ ପାଇଁ ନିମନ୍ତ୍ରଣ ପଠାଇ ଥିଲେ । ଏହା ପରେ ଗୁରୁ ବଶିଷ୍ଠ ଏବଂ ଶୃଙ୍ଗ ଋଷିଙ୍କ ନେତୃତ୍ୱରେ ଯଜ୍ଞ ଆରମ୍ଭ ହୋଇଥିଲା । ଯଜ୍ଞ ପାଇଁ ଦେଶର ବିଭିନ୍ନ ସ୍ଥାନରୁ ବହୁ ବିଦ୍ୱାନ ଯୋଗ ଦେଇଥିଲେ । ଏହି ମହାନ ଯଜ୍ଞ ବୈଦିକ ମନ୍ତ୍ରୋଚ୍ଚାର ଦ୍ୱାରା ସମାପନ ହୋଇଥିଲା । ସମାପ୍ତ ହେବା ପରେ, ରାଜା ଦଶରଥ ଅନେକ ଦାନ ଦେଇ ସମସ୍ତ ତପସ୍ୱୀ ଏବଂ ବ୍ରାହ୍ମଣମାନଙ୍କୁ ବିଦାୟ ଦେଇଥିଲେ ।

ରାଜା ଦଶରଥ ଯଜ୍ଞର ପ୍ରସାଦ ନିଜ ତିନି ପତ୍ନୀ କୌଶଲ୍ୟା, ସୁମିତ୍ରା ଏବଂ କୈକେଇଙ୍କୁ ଖାଇବାକୁ ଦେଇଥିଲେ । ପ୍ରସାଦର ପରିଣାମ ସ୍ୱରୂପ, ରାଣୀ କୌଶଲ୍ୟା ଗର୍ଭବତୀ ହୋଇଥିଲେ ଏବଂ ଏହିପରି ଭାବେ ଚୈତ୍ର ଶୁକ୍ଳ ନବମୀରେ ଶ୍ରୀ ରାମ ଜନ୍ମ ନେଇଥିଲେ । କୁହାଯାଏ ଯେ ଶିଶୁର ରଙ୍ଗ ନୀଳ ଥିଲା, ଚେହେରା ଉଜ୍ଜ୍ୱଳ ଏବଂ ଅତ୍ୟନ୍ତ ଆକର୍ଷଣୀୟ ଥିଲା । ଯେକେହି ସେହି ଶିଶୁକୁ ଦେଖୁଥିଲା ସେ ବିସ୍ମୟ ହୋଇ ଯାଉଥିଲା ।

ଯଜ୍ଞ ପ୍ରସାଦର ଫଳ ସ୍ୱରୂପ ରାଜା ଦଶରଥଙ୍କ ଦ୍ୱିତୀୟ ରାଣୀ ସୁମିତ୍ରା ଦୁଇ ପୁତ୍ର ଏବଂ କୈକେଇ ଗୋଟିଏ ପୁତ୍ର ସନ୍ତାନ ଜନ୍ମ ଦେଇଥିଲେ । ରାଜା ଦଶରଥଙ୍କର ସମସ୍ତ ପୁତ୍ର ତେଜସ୍ୱି ଥିଲେ । ଏହି ଚାରି ଭାଇଙ୍କ ନାମ ରାମ, ଲକ୍ଷ୍ମଣ, ଭରତ ଏବଂ ଶତ୍ରୁଘ୍ନ ରଖାଯାଇଥିଲା ।

କୁହାଯାଏ ଯେ ଶ୍ରୀ ରାମଙ୍କ ଜନ୍ମ ପରେ ଦେବତାମାନେ ଆକାଶରୁ ପୁଷ୍ପ ବର୍ଷା କରିଥିଲେ । ଅପସରା ମାନେ ନୃତ୍ୟ କରିଥିଲେ । ଚାରିଆଡେ ଆନନ୍ଦ ଉଲ୍ଲାସ ଥିଲା । ସମୟ ଗଡିବା ସହିତ ରାମ ନିଜର ତିନି ଭାଇଙ୍କ ଅପେକ୍ଷା ଅଧିକ ଗୁଣବାନ ହେବାକୁ ଲାଗିଥିଲେ । ସେ ସମସ୍ତ ବିଷୟ ଉପରେ ପାରଦର୍ଶୀ ଥିଲେ । ସେଥିପାଇଁ ତିନି ଭାଇ ମଧ୍ୟ ତାଙ୍କୁ ବହୁତ ସମ୍ମାନ କରୁଥିଲେ ।