ଟି-୨୦ ବିଶ୍ୱକପରେ ୱେଷ୍ଟଇଣ୍ଡିଜର ନିରାଶାଜନକ ପ୍ରଦର୍ଶନ ! ଯାଞ୍ଚ ପାଇଁ କମିଟି ଗଠନ, ୩ ଦିଗ୍ଗଜ ଖେଳାଳିଙ୍କୁ ମିଳିଲା ଦାୟିତ୍ୱ

ନୂଆଦିଲ୍ଲୀ : ଟି-୨୦ ବିଶ୍ୱକପ-୨୦୨୨ରେ ୱେଷ୍ଟଇଣ୍ଡିଜ୍ କ୍ରିକେଟ ଦଳର ପ୍ରଦର୍ଶନ ଅତ୍ୟନ୍ତ ନିରାଶାଜନକ ଥିଲା । ପ୍ରଥମ ରାଉଣ୍ଡରେ ୱେଷ୍ଟଇଣ୍ଡିଜ୍ ଦଳ ନିରାଶ କରି ଟୁର୍ଣ୍ଣାମେଣ୍ଟରୁ ବାହାରି ଯାଇଥିଲା । ଟୁର୍ଣ୍ଣାମେଣ୍ଟର ପ୍ରଥମ ରାଉଣ୍ଡରେ ଦୁଇ ଥରର ଚାମ୍ପିଅନ୍ ୱେଷ୍ଟଇଣ୍ଡିଜ୍ ଦଳକୁ ଆୟର୍ଲାଣ୍ଡ ଓ ସ୍କଟଲ୍ୟାଣ୍ଡ ବିପକ୍ଷରେ ପରାଜୟର ସମ୍ମୁଖୀନ ହେବାକୁ ପଡିଥିଲା । ବର୍ତ୍ତମାନ ଏହି ଦଳର ଏପରି ଟୁର୍ଣ୍ଣାମେଣ୍ଟରୁ ବାହାର ହେବାର ଅନୁସନ୍ଧାନ କରାଯିବ, ଯେଉଁଥି ପାଇଁ କ୍ରିକେଟ୍ ୱେଷ୍ଟଇଣ୍ଡିଜ୍ ଏକ କମିଟି ଗଠନ କରିଛି । ଏହି କମିଟିରେ ୱେଷ୍ଟଇଣ୍ଡିଜର ପୂର୍ବତନ ବ୍ୟାଟ୍ସମ୍ୟାନ୍ ବ୍ରାଏନ୍ ଲାରାଙ୍କୁ ମଧ୍ୟ ସାମିଲ କରାଯାଇଛି ।

ଯେଉଁ ଦିନ ତିନି ସଦସ୍ୟ ବିଶିଷ୍ଟ ପ୍ୟାନେଲ୍ ଗଠନ କରାଯାଇଛି, ସେମାନେ ନିଜ କାର୍ଯ୍ୟ ଆରମ୍ଭ କରିଦେଇଛନ୍ତି । ସେମାନେ ନିଜ ରିପୋର୍ଟ ବୋର୍ଡର ଡାଇରେକ୍ଟର୍ସଙ୍କ ପାଖରେ ଦାଖଲ କରିବ । ରିପୋର୍ଟ ସହିତ ସେମାନେ ବୋର୍ଡକୁ ମଧ୍ୟ ପରାମର୍ଶ ଦେବେ । ଏହି ସମୀକ୍ଷା ଭବିଷ୍ୟତ ପାଇଁ ମୂଳଦୁଆ ପକାଇବ ବୋଲି ବିଶ୍ୱାସ କରାଯାଉଛି । କ୍ରିକେଟ୍ ୱେଷ୍ଟଇଣ୍ଡିଜ୍ ଅଧ୍ୟକ୍ଷ ରିକି ସ୍କେରିଟ୍ କହିଛନ୍ତି ଯେ, ତାଙ୍କ ଦଳ ପାଇଁ ଏଭଳି ଜ୍ଞାନବାନ ଓ ସ୍ୱତନ୍ତ୍ର ପ୍ୟାନେଲର ସମୀକ୍ଷା କରିବା ଏକ ବଡ଼ କଥା ।

କିରନ୍ ପୋଲାର୍ଡ ହଠାତ୍ ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ୱେଷ୍ଟଇଣ୍ଡିଜ୍ ବୋର୍ଡ ନିକୋଲାସ୍ ପୁରନଙ୍କୁ ଦଳର ଅଧିନାୟକ କରିଥିଲା । ପ୍ରାରମ୍ଭରେ ପୁରନ ଅଧିନାୟକତ୍ୱ ଭଲ ଭାବରେ କରିଥିଲେ, କିନ୍ତୁ ତା’ପରେ ତାଙ୍କ ଦଳର ପ୍ରଦର୍ଶନ ଅତ୍ୟନ୍ତ ଖରାପ ଥିଲା । ଟି-୨୦ ବିଶ୍ୱକପରେ ପୁରନଙ୍କ ପ୍ରଦର୍ଶନ ବହୁତ ଖରାପ ଥିଲା । ଦଳର ବ୍ୟାଟିଂ ଅତ୍ୟନ୍ତ ଖରାପ ଥିଲା ଯେଉଁଥିରେ କେତେକ ବଡ଼ ବଡ଼ ନାମ ସାମିଲ ଥିଲା । ବିଶ୍ୱକପ ପାଇଁ ପ୍ରସ୍ତୁତି ପାଇଁ ୱେଷ୍ଟଇଣ୍ଡିଜ୍ ଅଷ୍ଟ୍ରେଲିଆ ବିପକ୍ଷରେ ଅଷ୍ଟ୍ରେଲିଆରେ ଟି-୨୦ ସିରିଜ୍ ଖେଳିଥିଲା । ଏହି ସିରିଜରେ ଦଳର ପ୍ରଦର୍ଶନ ଭଲ ଥିଲା ।

ସେପଟେ ୱେଷ୍ଟଇଣ୍ଡିଜର ପୂର୍ବତନ ଅଧିନାୟକ ଶିବନାରାୟନ ଚନ୍ଦପାଲ ମନେ କରନ୍ତି ଯେ, କିଛି ଖେଳାଳି ଦେଶର ପ୍ରତିନିଧିତ୍ୱ କରିବା ଅପେକ୍ଷା ଟଙ୍କା ରୋଜଗାର କରିବାକୁ ଅଧିକ ଆଗ୍ରହୀ ଅଟନ୍ତି । ଦୁଇ ଦଶନ୍ଧିରୁ ଅଧିକ ସମୟ ଧରି କାରିବିଆନ୍ ଦଳ ପାଇଁ ଖେଳିଥିବା ଚନ୍ଦପାଲ କହିଛନ୍ତି ଯେ, ସାରା ଦୁନିଆରେ ଟି-୨୦ ଲିଗର ପ୍ରଭାବ ୱେଷ୍ଟଇଣ୍ଡିଜ୍ ଦଳ ଉପରେ ପକାଉଛି । ସିଡନୀ ମର୍ନିଂ ହେରାଲ୍ଡ ଖବରକାଗଜ ସହିତ ଏକ ସାକ୍ଷାତକାର ସମୟରେ ଚନ୍ଦପାଲ୍ କହିଛନ୍ତି ଯେ, “ସାରା ବିଶ୍ୱରେ ଅନେକ ଟି-୨୦ ଲିଗ୍ ଖେଳାଯାଉଛି । ଆଜିକାଲି ଖେଳାଳିମାନେ ୱେଷ୍ଟଇଣ୍ଡିଜ୍ କ୍ରିକେଟ୍ ଉପରେ ନିର୍ଭରଶୀଳ ନୁହଁନ୍ତି । ତେଣୁ ମୁଁ ଭାବୁନାହିଁ ଯେ ଦେଶକୁ ପ୍ରତିନିଧିତ୍ୱ କରିବା ପାଇଁ ତାଙ୍କର ମନ ଅଛି । ସେମାନେ ଯାଇ ଅନ୍ୟତ୍ର ଖେଳନ୍ତି ଓ ୱେଷ୍ଟଇଣ୍ଡିଜର ପ୍ରତିନିଧିତ୍ୱ କରିବାକୁ ଧ୍ୟାନ ଦେଉନାହାଁନ୍ତି ।”