ଟେଷ୍ଟ ଅଧିନାୟକ ପଦ ଛାଡ଼ିଲେ କୋହଲି

ନୂଆଦିଲ୍ଲୀ : ଟେଷ୍ଟ ଅଧିନାୟକ ପଦ ଛାଡିଲେ ବିରାଟ କୋହଲି । ଭାରତୀୟ ଦଳର ଟେଷ୍ଟ ଫର୍ମାଟ ଅଧିନାୟକ ପଦରୁ ଇସ୍ତଫା ଦେଇଛନ୍ତି କୋହଲି । ଏ ନେଇ ବିରାଟ କୋହଲି ଟ୍ୱିଟ୍ କରି ସୂଚନା ଦେଇଛନ୍ତି । ପୂର୍ବରୁ ଟି-୨୦ ଫର୍ମାଟରୁ ମଧ୍ୟ ସେ ନିଜ ଆଡୁ ଇସ୍ତଫା ଦେଇଥିଲେ । ପରେ ଦିନିକିଆ ଅଧିନାୟକ ପଦରୁ କୋହଲିଙ୍କୁ ବିଦା କରିଥିଲା ବିସିସିଆଇ । ଏହାକୁ ନେଇ ଅନେକ ଆଲୋଚନା ପର୍ଯ୍ୟାଲୋଚନା ମଧ୍ୟ ହୋଇଥିଲା । ତେବେ ଶନିବାର ସମସ୍ତଙ୍କୁ ଝଟ୍‌କା ଦେଇଛନ୍ତି କୋହଲି । ଟ୍ୱିଟ୍ କରି ନିଜ ଆଡୁ ଟେଷ୍ଟ ଫର୍ମାଟର ଅଧିନାୟକ ପଦ ଛାଡିଛନ୍ତି । ଦକ୍ଷିଣ ଆଫ୍ରିକାରେ ଭାରତର ଟେଷ୍ଟ ସିରିଜ୍ ପରାଜୟ ପରେ ଟେଷ୍ଟ ଅଧିନାୟକ ପଦ ଛାଡିଛନ୍ତି କୋହଲି ।

ଟ୍ୱିଟ୍ କରି କୋହଲି କହିଛନ୍ତି, ‘ଗତ ୭ ବର୍ଷ ଧରି ଦଳକୁ ଆଗକୁ ନେବା ପାଇଁ ଅନବରତ ଭାବେ ଦଳକୁ ଆଗକୁ ନେବାକୁ ପ୍ରୟାସ କରିଥିଲି । ଏହି ସମୟ ମଧ୍ୟରେ ସଚ୍ଚୋଟତାର କାମ କରିଛି । ସବୁ ଜିନିଷର ଶେଷ ଥାଏ ଆଉ ଆଜି ମୋ ପାଇଁ ଭାରତୀୟ କ୍ରିକେଟ ଟିମ୍‌ର ଟେଷ୍ଟ ଅଧିନାୟକ । ଦଳ ପାଇଁ ସବୁବେଳେ ମୋର ଶତ ପ୍ରତିଶତ ଦେଇଛି ।’ କୋହଲି କହିଛନ୍ତି, ‘ବିସିସିଆଇ ମୋ ଉପରେ ଆସ୍ଥା ପ୍ରକଟ କରି ଏତେ ବର୍ଷ ଧରି ଦାୟିତ୍ୱ ଦେଇଥିବାରୁ କୃତଜ୍ଞତା ଜ୍ଞାପନ କରୁଛି । ଲମ୍ବା ସହମ ଧରି ଦଳକୁ ଆଗେଇ ନେବା ପାଇଁ ବିସିସିଆଇ ସହଯୋଗ କରିଛି । ଦାୟିତ୍ୱ ଗ୍ରହଣ କରିବାର ପ୍ରଥମ ଦିନରୁ ହିଁ ମୁଁ ମୋର କର୍ତବ୍ୟ ନିର୍ବାହନ କରିଆସିଛି । ଏଥିରେ ଭରପୁର ସହଯୋଗ କରିଛନ୍ତି ମୋର ସାଥୀ ଖେଳାଳିମାନେ ।’ ସାଥୀ ଖେଳାଳିଙ୍କୁ ପ୍ରଶଂସା କରି କୋହଲି କହିଛନ୍ତି, ‘ସମସ୍ତ ପ୍ରକାର ପରିସ୍ଥିତିରେ ଦଳର ସମସ୍ତ ଖେଳାଳି ମୋତେ ସହଯୋଗ କରିଛନ୍ତି । ଲମ୍ବା ସମୟ ଧରି ଭାରତୀୟ ଦଳର ଅଧିନାୟକତ୍ୱ ମଧ୍ୟରେ ଅନେକ କିଛି ଶିଖିବାକୁ ମିଳିଛି । ସାଥୀ ଖେଳାଳିଙ୍କୁ ଶିଖାଇବାର ସୁଯୋଗ ପାଇଛି । ଏହା ସହିତ ଏହି ଟ୍ୱିଟ୍‌ରେ ବିରାଟ ପୂର୍ବତନ କୋଚ୍ ରବି ଶାସ୍ତ୍ରୀ ତଥା ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କୁ ଧନ୍ୟବାଦ ଦେଇଛନ୍ତି । ତାଙ୍କ ଭିତରେ ନେତୃତ୍ୱ ନେବାର ଗୁଣ ରହିଛି ବୋଲି ମହେନ୍ଦ୍ର ସିଂହ ଧୋନି ସବୁ ବେଳେ ବିଶ୍ୱାସ କରୁଥିବାରୁ ବିରାଟ ତାଙ୍କୁ ଧନ୍ୟବାଦ ଜଣାଇଛନ୍ତି । ସେ ଭାରତୀୟ କ୍ରିକେଟ୍ ଟିମ୍‌କୁ ଆଗେଇ ନେବେ ବୋଲି ଧୋନି ସବୁବେଳେ ବିଶ୍ୱାସ କରୁଥିବା ବିରାଟ ଏଥିରେ ଉଲ୍ଲେଖ କରିଛନ୍ତି । ବିରାଟ କୋହଲି ଟେଷ୍ଟ ଅଧିନାୟକ ପଦ ଛାଡ଼ିବା ପରେ ବିସିସିଆଇ ଟ୍ୱିଟ୍ କରି ତାଙ୍କ ନେତୃତ୍ୱର ପ୍ରଶଂସା କରିଛି । ୨୦୧୪ ମସିହାରେ ବିରାଟ କୋହଲି ଭାରତୀୟ ଟିମ୍‌ର ଟେଷ୍ଟ ଅଧିନାୟକ ଭାବେ ଦାୟିତ୍ୱ ନେଇଥିଲେ । ସେ ମହେନ୍ଦ୍ର ସିଂହ ଧୋନିଙ୍କ ଠାରୁ ଏହି ଦାୟିତ୍ୱ ନେଇଥିଲେ । ତାଙ୍କ ନେତୃତ୍ୱରେ ଟିମ୍ ଇଣ୍ଡିଆ ୬୮ଟି ଟେଷ୍ଟ୍ ମ୍ୟାଚ୍ ଖେଳିଥିବା ବେଳେ ୪୦ଟିରେ ବିଜୟ ହାସଲ କରିଛି । ଗତ ବର୍ଷ ଡିସେମ୍ବରରେ ବିରାଟଙ୍କୁ ଟିମ୍ ଇଣ୍ଡିଆର ଦିନିକିଆ ଅଧିନାୟକ ଦାୟିତ୍ୱରୁ ମୁକ୍ତ କରାଯାଇଥିଲା ।

ସୂଚନାଯୋଗ୍ୟ, ଏମ୍‌ଏସ୍ ଧୋନୀ ଟେଷ୍ଟ ଅଧିନାୟକ ପଦ ଛାଡିବା ପରେ ୩୩ ବର୍ଷୀୟ କୋହଲି ୨୦୧୪ ମସିହାରେ ଅଧିନାୟକ ଭାରତ ଗ୍ରହଣ କରିଥିଲେ । ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦଳ ୬୮ଟି ଟେଷ୍ଟ ମ୍ୟାଚ୍ ଖେଳିଥିବା ବେଳେ ୪୦ଟି ମ୍ୟାଚ୍‌ରେ ଦଳ ବିଜୟୀ ହୋଇଛି । ସେହିଭଳି ୧୭ଟିରେ ଦଳ ପରାଜିତ ହୋଇଥିବା ବେଳେ ୧୧ଟି ମ୍ୟାଚ୍ ଡ୍ର’ ରହିଛି । ଭାରତ ପକ୍ଷରୁ କୋହଲି ମୋଟ ୯୯ଟି ଟେଷ୍ଟ ମ୍ୟାଚ୍ ଖେଳିଥିବା ବେଳେ ୭୯୬୨ ରନ କରିଛନ୍ତି । ଯେଉଁଥିରେ ୨୭ଟି ଶତକ ଏବଂ ୨୮ଟି ଅର୍ଦ୍ଧଶତକ ସାମିଲ ଅଛି ।