ଟେଷ୍ଟରୁ ଅବସର ନେଲେ ଏହି ଖେଳାଳି, ବହୁ ରେକର୍ଡର ଅଧିକାରୀ ଅଛନ୍ତି

ଲଣ୍ଡନ: ଇଂଲଣ୍ଡ କ୍ରିକେଟ୍ ଟିମ୍‌ର ଅଲ୍‌ରାଉଣ୍ଡର ମୋଇନ ଅଲ୍ଲୀ ଟେଷ୍ଟ୍ କ୍ରିକେଟ୍‌ରୁ ଅବସର ଘୋଷଣା କରଛନ୍ତି । ସୋମବାର ଇଂଲଣ୍ଡ ଓ ୱେଲ୍ସ କ୍ରିକେଟ୍ ବୋର୍ଡ ପକ୍ଷରୁ ଏକ ପ୍ରେସ୍ ରିଲିଜ୍ ମାଧ୍ୟମରେ ଏହି ସୂଚନା ଦିଆଯାଇଛି । ୨୦୧୪ରେ ଟେଷ୍ଟରେ ଡେବ୍ୟୁ କରିଥିଲେ ମୋଇନ୍ । ସେ ତାଙ୍କ ଟେଷ୍ଟ କ୍ୟାରିୟରରେ ମୋଟ ୬୪ଟି ମ୍ୟାଚ୍ ଖେଳିଛନ୍ତି । ସେ ଶ୍ରୀଲଙ୍କା ବିରୋଧରେ ପ୍ରଥମ ଟେଷ୍ଟ୍ ମ୍ୟାଚ୍ ଖେଳିଥିଲେ । ଶେଷଥର ପାଇଁ ଚଳିତ ମାସରେ ସେ ଭାରତ ବିପକ୍ଷରେ ଟେଷ୍ଟ ମ୍ୟାଚ୍ ଖେଳିଥିଲେ । ୬୪ଟି ଟେଷ୍ଟ୍ ମ୍ୟାଚ୍‌ରୁ ସେ ୨୮.୨୯ ହାରରେ ୨,୯୧୪ ରନ୍ କରିଛନ୍ତି । ଏହା ମଧ୍ୟରେ ରହିଛି ୫ଟି ଶତକ ଓ ୧୪ଟି ଅର୍ଦ୍ଧଶତକ । ସେହିଭଳି ଅଫ୍ ସ୍ପିନ୍ ବୋଲିଂ କରୁଥିବା ଅଲ୍ଲୀ ଟେଷ୍ଟରେ ୧୯୫ଟି ୱିକେଟ୍ ନେଇଛନ୍ତି । ଟେଷ୍ଟ୍ ବୋଲିଂରେ ତାଙ୍କର ଶ୍ରେଷ୍ଠ ପ୍ରଦର୍ଶନ ହେଉଛି ୫୩ ରନ୍‌ରେ ୬ଟି ୱିକେଟ୍ । ଟେଷ୍ଟ ପୂର୍ବରୁ ସେ ୨୦୧୪ରେ ଇଂଲଣ୍ଡର ଦିନିକିଆ ଟିମ୍‌ରେ ସ୍ଥାନ ପାଇଥିଲେ । ଏହି ଫର୍ମାଟରେ ସେ ତାଙ୍କ ଖେଳ ଜାରି ରଖିବେ ।

ଟେଷ୍ଟ୍‌ରୁ ଅବସର ଘୋଷଣା ଅବସରରେ ମୋଇନ ଅଲ୍ଲୀ କହିଛନ୍ତି, ମୋତେ ଏବେ ୩୪ ବର୍ଷ ହୋଇଛି । ମୁଁ ଚାହୁଁଛି ଯେତେଦିନ ପର୍ଯ୍ୟନ୍ତ ମୁଁ ଖେଳିପାରିବି ସେତେଦିନ ପର୍ଯ୍ୟନ୍ତ ଖେଳିବି । ମୁଁ ମୋ କ୍ରିକେଟ୍‌କୁ ଉପଭୋଗ କରିବାକୁ ଚାହୁଁଛି । ସେ କହିଛନ୍ତି, ଟେଷ୍ଟ୍ କ୍ରିକେଟ୍ ବହୁତ ବଢ଼ିଆ । ଯେଉଁ ଦିନଟି ତୁମର ହୋଇଥିବ, ସେହିଦିନ ଟେଷ୍ଟ କ୍ରିକେଟ୍‌ରୁ ଯେଉଁ ଆନନ୍ଦ ମିଳେ, ତାହା ଅନ୍ୟ ଫର୍ମାଟ୍‌ରୁ ମିଳେ ନାହିଁ । ମୁଁ ଟେଷ୍ଟ୍ କ୍ରିକେଟ୍‌ରୁ ବହୁତ ଆନନ୍ଦ ପାଇଛି । ମୁଁ ଭାବୁଛି ମୁଁ ଯଥେଷ୍ଟ ଖେଳି ସାରିଛି । ଏଥିରେ ମୁଁ ଯାହା କରିଛି, ସେଥିରେ ବହୁତ ସନ୍ତୁଷ୍ଟ ଅଛି । ଏହା ସହିତ ମୋଇନ ଅଲ୍ଲୀ ତାଙ୍କ ଟେଷ୍ଟ କ୍ୟାରିୟରରେ ତାଙ୍କୁ ସହଯୋଗ କରିଥିବା ସମସ୍ତ କୋଚ୍ ଓ ଅଧିନାୟକ ମାନଙ୍କୁ ସେ ଧନ୍ୟବାଦ ଦେଇଛନ୍ତି । ସେ ତାଙ୍କ ପରିବାର ଲୋକଙ୍କୁ ମଧ୍ୟ ଧନ୍ୟବାଦ ଦେଇଛନ୍ତି । ସେ କହିଛନ୍ତି, ମୋ ବାପାମା’ ମୋ ପାଇଁ ପ୍ରଥମ । ତାଙ୍କ ସମର୍ଥନ ବିନା ମୁଁ ଏସବୁ ଆଦୌ କରିପାରି ନଥା’ନ୍ତି । ମୁଁ ମୋର ସମସ୍ତ ମ୍ୟାଚ୍ ସେମାନଙ୍କ ପାଇଁ ଖେଳିଛି । ମୁଁ ଜାଣେ ସେମାନେ ମୋ ପାଇଁ ଗର୍ବ ଅନୁଭବ କରନ୍ତି । ମୋ ଖରାପ ସମୟରେ ମୋ ଭାଇ ଓ ଭଉଣୀମାନେ ମୋ ସହିତ ରହିଛନ୍ତି । ମୋ ପତ୍ନୀ ମଧ୍ୟ ମୋ ପାଇଁ ଅନେକ କିଛି ତ୍ୟାଗ କରିଛନ୍ତି । ଏ ସମସ୍ତଙ୍କ ନିକଟରେ ମୁଁ କୃତଜ୍ଞ । ସୂଚନାଯୋଗ୍ୟ, ମୋଇନ୍ ଅଲ୍ଲୀ ଚଳିତ ଆଇପିଏଲ୍‌ରେ ଚେନ୍ନାଇ ପକ୍ଷରୁ ଖେଳୁଛନ୍ତି ।