ଜାନୁଆରୀରେ ୧୦୪୫ ପିଲାଙ୍କୁ ଉଦ୍ଧାର କରିଛି ରେଳ ସୁରକ୍ଷା ବଳ

ନୂଆଦିଲ୍ଲୀ: ଚଳିତ ବର୍ଷ ଜାନୁଆରୀରେ ରେଳବାଇ ସୁରକ୍ଷା ବାହିନୀର କର୍ମଚାରୀମାନେ ୩୪୪ ବାଳିକାଙ୍କ ସମେତ ମୋଟ ୧୦୪୫ ପିଲାଙ୍କୁ ଉଦ୍ଧାର କରିଛନ୍ତି। ଯଦି ଠିକ୍ ସମୟରେ ସେମାନଙ୍କୁ ଉଦ୍ଧାର କରାଯାଇନଥାନ୍ତା ତେବେ ସେହି ୩୪୪ ବାଳିକା ଶୋଷଣର ଶିକାର ହେବାର ଆଶଙ୍କା ରହିଥିଲା ବୋଲି ରେଳବାଇ କହିଛି। ଏହା ଆରପିଏଫ୍ ଦ୍ୱାରା ପରିଚାଳିତ ‘ଅପରେସନ୍ ନହ୍ନେ ଫରିଷ୍ତେ’ର ଏକ ଅଂଶ। ବର୍ତ୍ତମାନ ଭାରତୀୟ ରେଳବାଇର ୧୩୨ଟି ରେଳ ଷ୍ଟେସନରେ ଚାଇଲ୍ଡ ହେଲ୍ପ ଡେସ୍କ କାର୍ଯ୍ୟକ୍ଷମ ରହିଛି।

ସରକାରୀ ସୂଚନା ଅନୁଯାୟୀ, ୨୦୨୨ ଜାନୁଆରୀରେ ‘ମିଶନ୍ ଜୀବନ ରକ୍ଷା’ ଅଧୀନରେ ଥିବା ଆରପିଏଫ୍ ଏହି ମିଶନ ଅଧୀନରେ ୨୦ ଜଣ ପୁରୁଷ ଏବଂ ୨୨ ଜଣ ମହିଳାଙ୍କ ସମେତ ୪୨ ଜଣଙ୍କୁ ଉଦ୍ଧାର କରିଥିଲା। ବିଭିନ୍ନ ରେଳ ଷ୍ଟେସନ ଏବଂ ରେଳବାଇ ଅଞ୍ଚଳରେ ସେଭଳି ଲୋକମାନଙ୍କୁ ଉଦ୍ଧାର କରାଯାଇଛି। ମହିଳା ଯାତ୍ରୀମାନଙ୍କୁ ଉନ୍ନତ ସୁରକ୍ଷା ସେବା ଯୋଗାଇବା ପାଇଁ ‘ମହିଳା ସୁରକ୍ଷା’ ନାମରେ ଅନେକ ନୂତନ ପଦକ୍ଷେପ ନିଆଯାଇଛି।

୨୦୨୨ ଜାନୁଆରୀରେ, ଆରପିଏଫ୍ ପ୍ରମୁଖ ରେଳ ଷ୍ଟେସନରେ ‘ମେରୀ ସହେଲି’ ଦଳ ନିୟୋଜିତ କରିଥିଲା ​​ଯେଉଁଥିରେ ଏକାକୀ ଯାତ୍ରା କରୁଥିବା ମହିଳା ଯାତ୍ରୀମାନଙ୍କୁ ସୁରକ୍ଷା ଯୋଗାଇ ଦିଆଯାଉଥିଲା ଏବଂ ଏହି ଉଦ୍ଦେଶ୍ୟରେ ସମଗ୍ର ଭାରତରେ ପ୍ରାୟ ୧୩ ହଜାର ଟ୍ରେନରେ ଏଭଳି ସୁରକ୍ଷା ବ୍ୟବସ୍ଥା ଗ୍ରହଣ କରିଥିଲା। ଅନ୍ୟାନ୍ୟ ପ୍ରତିଷେଧକ ବ୍ୟବସ୍ଥା ଗ୍ରହଣ କରି ଆରପିଏଫ୍ ପାଞ୍ଚଜଣଙ୍କୁ ଯୌନ ନିର୍ଯାତନା ଏବଂ ଦୁର୍ବ୍ୟବହାର ମାମଲାରେ ଗିରଫ କରିଥିଲା ​​ଏବଂ ଲେଡିଜ୍ କୋଚରେ ଯାତ୍ରା କରୁଥିବା ୨ ହଜାର ୧୮୫ ଜଣଙ୍କୁ ଗିରଫ କରିଥିଲା।ଏଥିରେ ୨୫୪ଟି ମାମଲାରେ ଜଡିତ ୩୦୦ରୁ ଅଧିକ ଅପରାଧୀଙ୍କୁ ଆରପିଏଫ୍ ଗିରଫ କରି ସମ୍ପୃକ୍ତ ପୁଲିସକୁ ହସ୍ତାନ୍ତର କରିଛି। ଏହାଛଡା ଆରପିଏଫ୍ ୮ ଜଣ ମାନବ ଚାଲାଣକାରୀଙ୍କୁ ଗିରଫ କରିବା ସହ ୩୫ ଜଣଙ୍କୁ ଉଦ୍ଧାର କରିଛି ଯେଉଁଥିରେ ୨୨ ଜଣ ନାବାଳକ ରହିଛନ୍ତି। ରେଳ ମାଧ୍ୟମରେ ନିଶା କାରବାର ବିରୁଦ୍ଧରେ ଆରପିଏଫ୍ ୪.୫୭ କୋଟି ଟଙ୍କା ମୂଲ୍ୟର ନିଶାଦ୍ରବ୍ୟ ଜବତ କରିବା ସହ ଗତ ଜାନୁୟାରୀ ମାସରେ ୮୭ ଜଣଙ୍କୁ ଗିରଫ କରିଛି।