ଏମଏସପିକୁ ନେଇ ମୋଦି ସରକାରଙ୍କ କ’ଣ ରହିଛି ଆଗାମୀ ପ୍ଲାନ; ଜାଣନ୍ତୁ ସବୁକିଛି

ନୂଆଦିଲ୍ଲୀ : ଏମଏସପିର ଅର୍ଥ ହେଉଛି ସର୍ବନିମ୍ନ ସମର୍ଥନ ମୂଲ୍ୟ । ଏମଏସପି ଦ୍ୱାରା ସରକାରଙ୍କ ତରଫରୁ ଚାଷୀଙ୍କୁ କିଛି ଶସ୍ୟ ଫସଲର ମୂଲ୍ୟ ଗ୍ୟାରେଣ୍ଟି ଦିଆଯାଇଥାଏ । ରାସନ ବ୍ୟବସ୍ଥା ଅନ୍ତର୍ଗତ ଅଭାବୀ ଲୋକଙ୍କୁ ଖାଦ୍ୟ ଶସ୍ୟ ଯୋଗାଇବା ପାଇଁ ସରକାର ଏହି ଏମଏସପିରେ ଚାଷୀଙ୍କ ଠାରୁ ସେମାନଙ୍କ ଫସଲ କ୍ରୟ କରନ୍ତି । ଏଥି ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏ ସମ୍ପର୍କରେ ଏକ ବଡ଼ ଘୋଷଣା କରିଛନ୍ତି ।

ବଜାରରେ ଫସଲର ଦର ଯେତେ କମ୍ ହେଉନା କାହିଁକି, ସରକାର ଏହାକୁ କେବଳ ସ୍ଥିର କରିଥିବା ଏମଏସପିରେ କିଣିବେ । ଯଦି ସରଳ ଶବ୍ଦରେ କୁହାଯାଏ, ଯେଉଁ ଫସଲର ଏମଏସପି ସରକାର ସ୍ଥିର କରିଛନ୍ତି । ସେଗୁଡିକୁ ନିର୍ଦ୍ଦିଷ୍ଟ ମୂଲ୍ୟରେ କିଣନ୍ତି । ଏହା ସହିତ କୃଷକମାନେ ସେମାନଙ୍କର ଫସଲର ଏକ ନିର୍ଦ୍ଦିଷ୍ଟ ମୂଲ୍ୟ କେତେ ତାହା ବିଷୟରେ ଜାଣିପାରନ୍ତି । କୃଷି ମୂଲ୍ୟ ଏବଂ ମୂଲ୍ୟ ଆୟୋଗ ଖରିଫ ଏବଂ ରବି ସିଜିନ୍ ଫସଲ ଆସିବା ପୂର୍ବରୁ ପ୍ରତିବର୍ଷ ଏମଏସପି ନିଶ୍ଚିତ କରିଥାଏ । ବର୍ତ୍ତମାନ ସରକାର ୨୩ ଟି ଫସଲ ପାଇଁ ସର୍ବନିମ୍ନ ସହାୟତା ମୂଲ୍ୟ (ଏମଏସପି) ସ୍ଥିର କରିଛନ୍ତି ।

କୃଷି ସଂସ୍କାର ପାଇଁ ୨୦୦୪ ରେ ସ୍ୱାମୀନାଥନ୍ କମିଶନ ଗଠନ କରାଯାଇଥିଲା । ଏମଏସପି ଫିକ୍ସିଂ ପାଇଁ ଆୟୋଗ ଅନେକ ସୂତ୍ର ପରାମର୍ଶ ଦେଇଥିଲା । ଉତ୍ପାଦନର ହାରାହାରି ମୂଲ୍ୟଠାରୁ ଏମଏସପି ଅତିକମରେ ୫୦ ପ୍ରତିଶତ ଅଧିକ ହେବା ଉଚିତ ବୋଲି ଡକ୍ଟର ଏମଏସ ସ୍ୱାମୀନାଥନ କମିଟି ପରାମର୍ଶ ଦେଇଥିଲେ । ପ୍ରତିବର୍ଷ ଫସଲ ପାଇଁ ସର୍ବନିମ୍ନ ସହାୟତା ମୂଲ୍ୟ ଫସଲ ବୁଣିବା ପୂର୍ବରୁ ସ୍ଥିର କରାଯାଇଥାଏ । ପ୍ରତ୍ୟେକ ଖରିଫ ଏବଂ ରବି ସିଜିନ୍ ପାଇଁ ଏମଏସପି ସ୍ଥିର ହୋଇଥାଏ । ଅନେକ କୃଷକ ଏମଏସପି ଦେଖିବା ପରେ ହିଁ ସେମାନଙ୍କ ଫସଲ ବୁଣନ୍ତି । ଏମଏସପିରେ ସରକାର ବିଭିନ୍ନ ଏଜେନ୍ସି ମାଧ୍ୟମରେ ଚାଷୀଙ୍କ ଠାରୁ ଖାଦ୍ୟ ଶସ୍ୟ କିଣୁଛନ୍ତି । ସରକାର ଏହାକୁ ଏମଏସପିରେ କିଣି ଖାଦ୍ୟ ଶସ୍ୟର ଏକ ବଫର୍ ଷ୍ଟକ୍ ପ୍ରସ୍ତୁତ କରନ୍ତି ।

ସରକାରୀ କ୍ରୟ ପରେ, ଏହି ଶସ୍ୟ ଏଫସିଆଇ ଏବଂ ଏନଏଏଫଇଇଡ଼ିରେ ଜମା ହୋଇଥାଏ । ଏହି ଶସ୍ୟ ସର୍ବସାଧାରଣ ବଣ୍ଟନ ବ୍ୟବସ୍ଥା (ପିଡ଼ିଏସ) ପାଇଁ ବ୍ୟବହୃତ ହୁଏ । ଯଦି ବଜାରରେ କୌଣସି ଶସ୍ୟର ବୃଦ୍ଧି ଘଟେ, ତେବେ ସରକାର ଖୋଲା ବଜାରରେ ଥିବା ବଫର ଷ୍ଟକରୁ ଶସ୍ୟ ବାହାର କରି ମୂଲ୍ୟ ଉପରେ ନିୟନ୍ତ୍ରଣ କରନ୍ତି । ଭବିଷ୍ୟତକୁ ଧ୍ୟାନରେ ରଖି ଏମଏସପିକୁ ଅଧିକ ପ୍ରଭାବଶାଳୀ ଏବଂ ସ୍ୱଚ୍ଛ ତଥା ଏହିପରି ସମସ୍ତ ବିଷୟ ଉପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଦିନ କହିଛନ୍ତି । ସରକାର ଏକ ବଡ ନିଷ୍ପତ୍ତି ନେଇଛନ୍ତି । ଏହି ସମସ୍ତ ବିଷୟ ପାଇଁ ଏକ କମିଟି ଗଠନ କରାଯିବ । ଏହି କମିଟିରେ କେନ୍ଦ୍ର ସରକାର, ରାଜ୍ୟ ସରକାର, କୃଷକ, କୃଷି ବୈଜ୍ଞାନିକ, କୃଷି ଅର୍ଥନୀତିଜ୍ଞଙ୍କ ପ୍ରତିନିଧୀ ମାନେ ରହିବେ । ବିଶେଷଜ୍ଞମାନେ କହିଛନ୍ତି ଯେ କେବଳ କମିଟିର ନିଷ୍ପତ୍ତି ଉପରେ ଏମଏସପି ନିଷ୍ପତ୍ତି ନିଆଯିବ । ଏହା ସହିତ ଚାଷୀଙ୍କ ଆୟ ବୃଦ୍ଧି ପାଇଁ ସରକାର ଆହୁରି ଅନେକ ବଡ ପଦକ୍ଷେପ ନେଇପାରିବେ ।