ଟି୨୦ ବିଶ୍ୱକପ୍ : ସେମିରେ ପ୍ରବେଶ କଲା ପାକିସ୍ତାନ

ଆବୁଧାବି : ଆବୁଧାବିରେ ଟି-୨୦ ବିଶ୍ୱକପ୍ ଗ୍ରୁପ-୨ର ଏକ ମ୍ୟାଚରେ ମଙ୍ଗଳବାର ନାମିବ୍ୟା ଓ ପାକିସ୍ତାନ ମୁହାଁମୁହିଁ ହୋଇଥିଲେ । ଏହି ମୁକାବିଲାକୁ ୪୫ ରନରେ ଜିତିବା ସହିତ ସେମି ଫାଇନାଲ ପ୍ରବେଶ କରିଛି ପାକିସ୍ତାନ । ମହମ୍ମଦ ରିଜୱାନ ଓ ବାବର ଆଜମଙ୍କ ଅର୍ଦ୍ଧଶତକ ସହାୟତାରେ କ୍ରମାଗତ ଚତୁର୍ଥ ମ୍ୟାଚରେ ବିଜୟୀ ହୋଇଛି ପାକିସ୍ତାନ ।

ଟସ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ପାକିସ୍ତାନର ବ୍ୟାଟ୍ସମ୍ୟାନମାନେ ଆରମ୍ଭରୁ ସତର୍କତାର ସହ ଖେଳିଥିଲେ ମଧ୍ୟ ପରବର୍ତ୍ତୀ କାଳରେ ରନଗତି ବଢାଇଦେଇଥିଲେ । ଅନଭିଜ୍ଞ ନାମିବ୍ୟାର ବୋଲିଂ ପାକିସ୍ତାନୀ ବ୍ୟାଟ୍ସମ୍ୟାନମାନଙ୍କ ଉପରେ କୌଣସି ପ୍ରଭାବ ପକାଇପାରିନଥିଲା । ପାକିସ୍ତାନ ପକ୍ଷରୁ ରିଜୱାନ ୫୦ ବଲ ଖେଳି ଅପରାଜିତ ୭୯ ରନ କରି ଅପରାଜିତ ରହିଥିଲେ । ଏହି ଇନିଂସରେ ୮ଟି ଚୌକା ଓ ୪ ଛକା ସାମିଲ ଥିଲା । ସେହିପରି ବାବର ଆଜମ ୪୯ ବଲରେ ୭୦ ରନ କରିଥିବା ବେଳେ ମହମ୍ମଦ ହଫିଜ୍ ୩୨ ରନ ସଂଗ୍ରହ କରିଥିଲେ । ଫଳରେ ପାକିସ୍ତାନ ନିର୍ଦ୍ଧାରିତ ୨୦ ଓଭରରେ ୧୮୯ରନ କରିଥିଲା । ୱାେଇଜେ ଓ ଫ୍ରାଇଲିଙ୍କ ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ । ଜବାବରେ କ୍ରେଗ ୱିଲିୟମ୍ସଙ୍କ ୪୦ ଓ ଡେଭିଡ ୱାଇଜେଙ୍କ ଅପରାଜିତ ୪୩ ରନ ସତ୍ତ୍ୱେ ବିଜୟରୁ ୪୫ ରନ ଦୂରରେ ରହିଥିଲା ନାମିବ୍ୟା । ପାକିସ୍ତାନ ପକ୍ଷରୁ ହସନ ଅଲୀ, ଇମାଦ ୱାସିମ, ହରିସ ରୌଫ୍ ଓ ଶଦାବ ଖାନ ଗୋଟିଏ ଲେଖାଏଁ ୱିକେଟ ନେଇଥିଲେ ।