ଉତ୍ତରକୋରିଆରେ ଗୋଟିଏ ବି କୋଭିଡ ମାମଲା ପଞ୍ଜିକୃତ ହୋଇନାହିଁ !

ସିଓଲ : ଚୀନ୍‌ରୁ ଆରମ୍ଭ ହୋଇଥିବା ପ୍ରାଣଘାତୀ କରୋନା ଭାଇରସ ବର୍ତ୍ତମାନ ସୁଦ୍ଧା ସାରା ବିଶ୍ୱରେ ୪ ମିଲିୟନରୁ ଅଧିକ ଲୋକଙ୍କ ଜୀବନ ନେଇସାରିଲାଣି । ବେଜିଂର ପଡୋଶୀ ଦେଶ ଉତ୍ତର କୋରିଆ କହିଛି ଯେ ଏପର୍ଯ୍ୟନ୍ତ ତାଙ୍କ ଦେଶରେ ଗୋଟିଏ ବି କୋଭିଡ ମାମଲା ପଞ୍ଜିକୃତ ହୋଇନାହିଁ । ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) କୁ ଉତ୍ତର କୋରିଆ ଏହି ସୂଚନା ଦେଇଛି ।

ସୂଚନା ଯେ, ଉତ୍ତରକୋରିଆରେ ଜୁନ୍ ୧୦ ପର୍ଯ୍ୟନ୍ତ କରୋନାଭାଇରସ୍ ପାଇଁ ୩୦ ହଜାରରୁ ଅଧିକ ଲୋକଙ୍କୁ ପରୀକ୍ଷା କରାଯାଇଛି । କିନ୍ତୁ ଏପର୍ଯ୍ୟନ୍ତ ଦେଶରେ କୌଣସି ସଂକ୍ରମଣର ରିପୋର୍ଟ ହୋଇନାହିଁ । ଉତ୍ତର କୋରିଆର ଅନୁସନ୍ଧାନ ଅନୁଯାୟୀ, ହୁ ଏକ ସର୍ଭେ ରିପୋର୍ଟରେ କହିଛି ଯେ ଜୁନ୍ ୪ ରୁ ଜୁନ୍ ୧୦ ମଧ୍ୟରେ ୭୩୩ ଜଣଙ୍କର ପରୀକ୍ଷା କରାଯାଇଥିଲା । ଯେଉଁଥିରେ ୧୪୯ ଜଣ ବ୍ୟକ୍ତି ସ୍ୱାଇନ୍ ଫ୍ଲୁ ଭଳି ରୋଗ କିମ୍ବା ଶ୍ୱାସକ୍ରିୟା ସଂକ୍ରମଣରେ ଆକ୍ରାନ୍ତ ହୋଇଥିଲେ । ସେପଟେ ବିଶେଷଜ୍ଞମାନେ ଉତ୍ତର କୋରିଆର ଏହି ଦାବିକୁ ସନ୍ଦେହ କରୁଛନ୍ତି । ସେମାନଙ୍କ ମତରେ ଏଠାରେ ସଂକ୍ରମଣର କୌଣସି ମାମଲା ନାହିଁ, ଯେତେବେଳେ କି ଏହାର ସ୍ୱାସ୍ଥ୍ୟ ଭିତ୍ତିଭୂମି ଅତ୍ୟନ୍ତ ଖରାପ । କେବଳ ସେତେକି ନୁହେଁ ଉତ୍ତର କୋରିଆର ବଡ ସହଯୋଗୀ ତଥା ଆର୍ଥିକ ଜୀବନ ରେଖା କୁହାଯାଉଥିବା ଚୀନ୍ ସୀମା ସହ ଏମାନଙ୍କ ସୀମା ଲାଗି ରହିଛି । ଯଦି କୌଣସି ସନ୍ଦେହ ନାହିଁ ତାହେଲେ ସୀମା ପାର ହେଉଥିବା ଯାତାୟାତ ଏବଂ ବାଣିଜ୍ୟକୁ ସମ୍ପୂର୍ଣ୍ଣ ନିଷିଦ୍ଧ କାହିଁକି କରାଯାଇଛି । ଉତ୍ତର କୋରିଆର ନେତା କିମ ଜୋଙ୍ଗ ଉନ ଗତ ସପ୍ତାହରେ ଏକ ରାଜନୈତିକ ସମ୍ମିଳନୀରେ ଅଧିକାରୀମାନଙ୍କୁ କହିଥିଲେ ଯେ କୋଭିଡ-୧୯ ପ୍ରତିବନ୍ଧକକୁ ଦୀର୍ଘ ସମୟ ଧରି ରଖିବାକୁ ପ୍ରସ୍ତୁତ ହେବାକୁ ଦେଶ ସୂଚାଇ ଦେଇଛି ଯେ ଦେଶ ଏପର୍ଯ୍ୟନ୍ତ ଏହାର ସୀମା ଖୋଲିବାକୁ ପ୍ରସ୍ତୁତ ନୁହେଁ ।